ភ្នំពេញ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានលើកឡើងថា មិនគួរមានការជេរប្រមាថ រើសអើង ឬស្អប់ខ្ពើមចំពោះកីឡាករ ប៊ូ ខាវ ដែលអញ្ជើញមកកម្ពុជាក្តី ឬមិនមកកម្ពុជាក្តី។
សម្តេចតេជោបានសរសេរនៅក្នុងឆាណែលតេឡេក្រាមដូច្នេះថា៖ «បើទោះកីឡាករ ប៊ួ ខាវ មិនមកឬមកយើងមិនត្រូវបង្កើតនូវការរើសអើងឬស្អប់ខ្ពើមចំពោះគាត់ទេទោះជាគាត់ធ្វើអ្វីមិនសមរម្យចំពោះយើងក៍ដោយ។ កូនត្រូវមើលឲ្យឆ្ងាយជាង ប៊ួ ខាវព្រោះគាត់មកប្រទេសយើងតំណាងឲ្យប្រជាជនថៃជាង ៦០លាននាក់ដែលបញ្ហានេះវាក្លាយជាបញ្ហារវាងប្រទេសនិងប្រទេសដែលចាំបាច់ត្រូវមានមិត្តភាពនិងសាមគ្គីភាពជាមួយគ្នា»។
សម្តេចតេជោបន្តថា សូមកុំឲ្យកីឡាក្លាយជារឿងនយោបាយ និងសូមកុំឲ្យរឿងបុគ្គលក្លាយជាជម្លោះរវាងជាតិនិងជាតិប្រទេសនិងប្រទេស។
សម្តេចថ្លែងថា៖ «សូមរក្សាភាពថ្លៃថ្នូរក្នុងឋានៈជាម្ជាស់ផ្ទះនិងសូមប្រើប្រាស់ឱកាសនេះកសាងមិត្តភាពជាមួយប្រទេសទាំងអស់ដែលមកកាន់ប្រទេសយើងដើម្បីចូលរួមប្រកួតឬទស្សនាកីឡាអាស៊ីអាគ្នេយ៍លើកទី៣២ ដែលកម្ពុជាធ្វើជាម្ចាស់ផ្ទះ»៕
